مرحلة اليأس

مرحلة اليأس
على كل المتحلين بالامل ان يتوقفوا عن قراءة هذة التدوينة

عزيزى المصرى المتطلع للمستقبل احب ابشرك انه بدل ما تتعب نفسك وتتطلع للمستقبل ارجع للماضى وللتاريخ وانت هتكتشف بنفسك  ان عمر مصر ما هتبقى من الدول العظيمة ان عمر مصر ما هيكون فيها حرية ان عمر مصر ما هيكون فيها عدل يا ريت بس ترجع وتشوف كام ثورة قام بيها المصريين ضد الظلم وكل مرة الوضع بيسوء اكتر  اوعى تفكر فى يوم ان  البلد هيكون فيها الغنى والقفير بيتعاملوا واحد قدام القانون اوعى تتخيل ان الغنى هيتعالج زى الفقير فى نفس المستشفى واوعى تحلم ان جودة تعليم الغنى هتكون هى هى نفس جودة تعليم الفقير البلد دى طول عمرها اسياد  وعبيد ناس فوق وناس تحت  خدم وحشم  اختلف الحاكم بقى كان فرعون اله ولا ملك ولا عسكرى ولا رئيس منتخب  الوشوش بتتغير  والظلم واحد كل فترة ليها اصحاب الحظوة والنفوذ بتوعها  كل حاكم بيمثل دور الخايف على الشعب وانه  خايف على مصلحته واحنا بنصدق شوية بنصدق علشان مضحوك علينا وشوية بنصدق علشان ما فيش قدمنا غير اننا نصدق راجع تاريخك وشوف الثوارت من ايام الفراعنة واحنا بنثور وايه الناتج وايه اللى حصل يبقى الوضع كما هو عليه يا ريت حضرتك تقولى ايه اللى ترتب على ثورة عرابى وسعد زغلول ولا حتى ثورة يوليو  كل اللى بيحصل ان وجوه الطبقة الحاكمة بتتغير وان شوية متسلقين ومتشوقين للسلطة بيظهروا ويركبوا وبعد كده الشعب يظل الوضع كما هو عليه 

مصر هى امى المقولة دى فيها اهانة لمعنى الامومة قولى سبب واحد يخلينى اعتبر مصر هى امى الجهل اللى فيها ولا الكبت ولا يمكن العنف والطائفية طيب قولى سبب واحد يخلينى ادخل جيشها وادافع عنها غير الاسباب الدينية والعقائدية  يعنى مثلا قولى  اللى حاربوا فى اكتوبر اخدوا ايه  يعنى هما دافعوا عن الارض والارض مستباحة من يومها لليهود  قولى مثلا لو اسرائيل دخلت سينا انا اروح ادافع عنها ليه ؟؟ علشان بعد كده الحكومات تيجى وتسيبها صجرا وتتحجج باوهام عن عجز تنميتها  طيب قولى برضه انا ممكن ادخل الجيش ليه علشان اخدم فيه واشتغل فى مصنع حلل وفى الاخر يدونى 230 جنيه والجنرالات ياخدوا ارباح يا سلام ولا يمكن احرص فرن عيش ولا بنزينة اللى الجنرالات برضه بياخدوا ارباحها

بتحلم مصر تبقى زى اوربا واميريكا يبقى بطل تحلم علشان احنا عندنا مخزون فائض من الجهل والعنجهية والتكبر وما تعرفش انا ابقى مين يعنى مثلا حضرتك مفكر ثورة القضاة دى كلها علشان القانون او الحفاظ عليه او انهم يد الله فى الارض لا اطلاقا هما بيدافعوا عن مكاسب كسبوها بن القاضى يطلع قاضى وبن الفقير يشتغل فى مطعم والله انا لا احمل اى حقد طبقى فأنا الحمد لله اتعلمت نسبيا كويس واقدر اتعالج فى مستشفى مناسب لو مرضت وعندى مستقبل نظريا كويس

ارجع تانى واقول قولى الشهيد اللى نزل يقاوم نظام مبارك اخد ايه ؟؟؟

اهله اتمرمطوا واخدوا كام الف ملطوش  مش مشكلة عندنا شباب كتير ممكن حضرتك شباب الاخوان اللى اتقتلوا اخدوا ايه ؟؟؟ لا ما هو مرسى بقى رئيس والكتاتنى بقى رئيس الحرية والعدالة والعريان والبلتاجى و ... ,..... اه  كده الشهدا اخدوا حقوقهم
وانا بكتب الكلام ده دلوقتى فيه اشتباكات ومظاهرات فى كل مكان  وكله بيضرب فى كله وكله مفكر ان معاه الحق 


مختصر مفيد انى عمرى ما هاكون اداة فى ايد حد وان لو جات لى فرصة انى اسيب البلد دى دلوقتى حالا هأسيبها اوصفنى بالخاين اوصفنى  باليأس والاحباط والجبن   مش مشكلة  فلتذهب مصر الى الجحيم ولتعش  دولة الانا

مرفق قصيدة الاسم المشطوب للابنودى