ثانوية عامة وبتاع

بما ان النهاردة كانت نتيجة الثانوية العامة وامبارح كانت نتيجة الثانوية الازهرية فلقيت عندى الرغبة انى اكتب شوية  عن وجهة نظرى فى الثانوية العامة وعن التعليم فى مصر اليومين دول عموما

الثانوية العامة او الفزاعة زى ما ناس كتير بتسميها انا من راى ولا ليها اى لازمة يعنى  بتلاقى كل البيوت فيها شدة وحزم وضغوط وتلاقى الواد او البنت من دول بتاخد فى المادة درس واتنين وتلاتة علشان يجيب مجموع كبير يقدر من خلاله يدخل كلية مما يسمى كليات القمة فى الحقيقة انا مش عارف يعنى ايه اصلا سموها كليات قمة يمكن عشان بتخلى لك مستوى اجتماعى كويس او يمكن رواتب خريجينها اعلى نسبيا من الكليات التانية ما علينا

انا مفترض انى مهندس دلوقتى فمريت بمرحلة الثانوية دى  بس لو جيت وسألتنى ايه فايدتها اقولك دخلتنى كلية هندسة غير كده تقريبا الطالب بيطلع من الثانوية مييح بمجرد ما يطلع من اخر امتحان بتكون كل المعلومات اللى هو صاممها طارت وذهبت مع الريح


سؤال دلوقتى ليه كل الناس بتدخل ثانوية عامة؟؟ وليه كل الناس تدخل جامعة اصلاً ؟؟
الاجابة ستكمن فى الاساس بالمكانة الاجتماعية او الوضع الاجتماعى لكن مثلا لو بصينا من الناحية المادية فهنلاقى المتربعين على عرش العالم ومليونيرات العالم ما كملوش تعليمهم او ما اخدوش شهادة جامعية ما عدا الاتنين المؤسسين لجوجل هما دول اللى كملوا ومعاهم دكتوراه
انا مش بقلل من قيمة الشهادة الجامعية بس الفكرة اننا لو فعلا عاوزين نطلع من الكبوة بتاعتنا دى لازم جزء كبير من ثقافتنا يتغير  يعنى مثلا بتلاقى فى كلية حقوق 7000 واحد فى الجامعة الواحدة هل حضرتك محتاج العدد ده كله فى سوق العمل بالطبع لا طيب ما هو بعد كده هيتخرج ويحتاج وظيفة ومش هيلاقى فالبتالى عندنا بطالة ومعظمهم بيرفض يشتغل حاجة تانية فى غير مجاله

طيب وايه الحل ؟؟ الحل من وجهة نظرى هو الاهتمام بالتعليم الفنى وتبقى المدارس الفنية مؤهلة فعلا انها تخرج ناس بكفائة عالية ده بالاضافة لتقليل عدد المقبولين فى الثانوية العامة وعدد المقبولين فى الجامعات وزيادة عدد الجامعات فى نفس الوقت

طيب انت شايف امل ان ده يحصل قريب ؟؟ للاسف لا  ومش شايف حتى حد بيفكر بالطريقة دى وكلنا لسه عاوزين ندخل ثانوية عامة ونذاكر علشان نجيب مجموع وندخل كلية قمة 

اول امبارح بنت اخوى 10 سنين لاقيتها عمالة تذاكر علوم ده المقرر عليها السنة اللى جاية لاحظوا بتذاكر من دلوقتى وعمالة تحفظ المادة هى كل ما يشغل حيز من الفراغ وله حجم وله كتله فكرتنى بنوفل ثانى اكسيد الكربون لا يشتغل ولا يساعد على الاشتعال  فسألتها طيب زى ايه المادة دى يا هاجر لاقيتها سكتم بكتم ومش عارفة بس انا متأكد انها هتنجح وتجيب درجات عالية لانها حافظة كويس  وقس على ذلك كل المراحل التعلمية



اتمنى من ربنا ان ثقافتنا تتغير شوية ونعرف ان الصنايعى الشاطر زيه زى الدكتور بل احسن منه كمان وممكن  يكون دخله اعلى منه وان كونك مبيض محارة او مبلط ده شئ لا يعيبك على الاطلاق بل ان المجتمع محتاجك اكتر مثلا من خريج تجارة وعاطل او خريج حقوق وعاطل او حتى خريج هندسة وعاطل واخيرا ما حدش بيتغنى من كونه موظف ولو عاوز تتغنى فعلا لازم تبدأ تفكر فى مشاريع وتبدأ بيها  وثروتك الحقيقية  فى بداية حياتك مش فلوسك لكن افكارك .