احنا شعب متدين بالفطرة 2

فى البداية عاوز اشكر كل الناس اللى شاركتنى وقالت رأيها فى المشاركة الاولى وقدمت لى نصايح واراء محترمة  وكان اول الناس اللى قدموا لى نصايح هو الموهوب احمد حلمى  لا لا مش احمد حلمى اللى اتجوز عايدة فى اغنية شعبان عبد الرحيم يوووه لا برده مش هو بتاع اسف على الازعاج ولا الف مبروك الله يبارك فيك يعم مش هو جوز منى زكى  المهم احمد حلمى ده شخصية موهوبة بتكتب بقالها فترة وكانت اهم نصايحة لى انى بكتب بالعامية فكان ردى بكل بساطة انا قاصد اكتب بالعامية لانها هتبقى اسهل للكل ان يفهم وده دور اللغة انها تكون بسيطة ومفهومة ثانيا انا مش بكتب كتابة احترافية علشان اتقيد بالكتابة بالعامية المدونة دى كلها عبارة عن مشاركة لافكارى مع الناس السبب التالت انى ممكن لو كتبت  بالفصحى انى مش اقدر اوصل اللى عاوز اوصله للناس بسلاسة تانى نقد ان كان فيه اخطاء املائية كتير وده معاه حق فيه فأنا بعتذر عن ده لأنى من الناس اللى بتضايق لما حد يكتب (انا متدايق ) او يكتب (الاودة بدل من الاوضة ) تالت نقد قال لى انى لازم احط امثلة واقعية على كل مشكلة وده كلامه منطقى فيه جداا جداا وبالرجوع الى الذاكرة لاقيتها مليانة بالامثلة على قضية الواسطة دى مثلا  وان شا الله كل ده يتحل فى الكتابات اللى جاية .
محمد بهاء والرمادى الاتنين اتفقوا انى اسهبت فى فى الموضوع الفرعى اللى هو الواسطة عن الموضوع الرئيسى اللى هو التدين والمشكلة دى انا هتدراكها دلوقتى انى فعلا هافرد لكل مشكلة من المشكلات اللى بتنفى التدين جزئية منفردة بعد كده ان شا الله .

***** **** **** ****** ***** ***** ****** ***** *** ***** **** * * * *********
نرجع تانى لمشكلة الواسطة وهاقول فيها كام مثال كده استوقفونى
1- بن العمدة  وده شخصية لطيفة جداا بس  الفكرة انه علشان بن العمدة وده يعتبر بن ناس مهمين بالنسبة للارياف كانت مشكلته انه لا بيعرف يقرأ ولا يكتب وكان كل سنة من اولى ابتدائى لحد تانية اعدادى بينجح  يا اما بالغش او كوسة من المدرسة او مراقب من اللى عارفين والده يكتبوا له وينجح الى ان وصل لتالتة اعدادى وكانت الطامة الكبرى المراقبين هيجوا من خارج المدرسة او بالاحرى احتمال يكونوا من خارج الادارة التعلمية كمان يا وقعتك الطين يا بن العمدة المهم دخل الامتحانات وسقط دخل الدور التانى وسقط  لحد وببالفعل عاد 3 اعدادى فوالده خاف على مستقبله هيعمل ايه فى السنة دى ممكن يسقط تانى فهنا جه الحل العبقرى قبل الامتحانات جبسوا لابن العمدة ايده ودخلوا معاه مرافق وبالفعل  نجح وهنا كانت الافراح والليالى الملاح بن العمدة نجح فى الاعدادية والحمد لله قدر يتحصل على دبلوم ثانوى صناعى ولأن بن العمدة له قرايب مهميين قدر انه يشتغل فى احد شركات البترول هو صحيح اشتغل شغلانة مش محتاجة اى ابداع بس بياخد راتب مش بيتحصل عليه دكتور بشرى فى بداية حياته وكانت الفرصة دى ممكن تكون من نصيب الاف الشباب المجتهد بجد ما علينا


2- مستشار المحافظ اللى بيعتبر تعين اقاربه نوع من صلة الرحم وان الاقربون اولى بالمعروف فى حين لو اى حد تانى طلب منه انه يساعده يقوله ما اقدرش اساعدك
3- المهندس الملتحى وهو شاب خلوق محترم جداا التقيته فى اثناء فترة تدريب فى احدى شركات البترول  لكنه بيعتبر الواسطة رزق وان ربنا جعل الواسطة سبب فى فتح بيوت كتير مش مهم بقى من اولى ومين يستحق ومين لا
                  ***** **** **** **** ****** ***** **** **** **** ****** ***** *****
نرجع بقى للموضوع الرئيسى واننا شعب متدين بالفطرة كل الفكرة اللى محتاجها توصل للناس اننا مش شعب متدين لأننا لو فعلا شعب متدين ما كنش هيبقى فينا امراض زى الواسطة والمحسوبية الفساد المالى والاخلاقى التحرش الجنسى اكل الحقوق والمواريث
التخلف العنف الارهاب الجهل كل دى امراض احنا كمجتمع ولا استثنى احد الا من رحم ربى  بيعانى منها لو اننا شعب متدين بجد لسودنا العالم  بس للاسف احنا اخدنا التدين مظهر  لحية وتقصير ثوب وشوية كلام زى الحمد لله وان شاء الله ويمكن بنصلى فى الجامع ومحدش يفهمنى غلط من حقك تربى لحيتك وتقصر ثوبك بس الدين فى الاول وفى الاخر هو علاقتك مع ربنا فأنا لا يعنينى بشئ كل ده يعنى مثلا الناس او ما تشوف واحد ملتحى تقوله يا شيخ صلاتك وعبادتك دى بين وبين ربنا ما ليش فيها . كل اللى اتمناه من ربنا اننا نكون فعلا شعب متدين  مش مظهر بس لا ما يهمنيش بتصلى كام ركعة لله او بتصوم كام يوم غير  رمضان ده بينك وبين ربنا لكن اللى يهمنى لو انت بياع اجى اشترى منك تكون صادق ومش تبيع بزمتين لو انت مدرس تشرح بضمير فى الفصل لو انت سباك ما تبقاش نصاب لو انت رئيس ما تبقاش كذاب وبتخلف وعدك وتحقق لى  عدالة اجتماعية لو انت دكتور جامعة مش تحط لى شيت فى اخر الكتاب علشان اشتريه لو انت طبيب يا ريت تخصص يوم مجانى للمحتاجين ومش معاهم تمن كشفك الامثلة كتيرة وكل مثال ممكن نفرد له صفحات فى سلبياته . انا املى فعلا اننا نكون شعب متدين بس مش هأقدر اقول كده الا لما نسبة البطالة تقل لما نسبة التحرش تقل لما نسبة الكذب والغش فى التجارة تقل لما جامعاتنا تتصنف بين الجامعات ساعتها بس هأقول اننا شعب متدين .

احنا شعب متدين بالفطرة

مش عارف ليه اهتميت ان دى تكون اول فقاعة اكتب عنها جملة بتردد كتير اوى فى الاعلام بين الناس بين المثقفين بين عامة الناس اصل احنا شعب متدين احنا  شعب متدين بالفطرة فالصراحة بقى  انا بقيت محتار ما هو يا  اما هما فاهمين التدين غلط يا اما انا اللى اعمى ومش بشوف التدين ده .انا ما سافرتش اوربا ولا اميريكا علشان اعقد وجه مقارنة بين الشرق والغرب بس كل اللى اقدر اعمله انى هأسلط  الضوء على شوية مشاهد فى الشعب المصرى وهأسيب الحكم للقارئ انه يحدد هل احنا فعلاً شعب متدين بالفطرة ولا الكلمة دى فقاعة من الفقاعات 

1-الواسطة
لو انت مصرى واتولدت فى مصر فالكلمة دى مش هتبقى غريبة ابدا عليك يمكن من اول ما اتولدت لحد ما بتقرأ الكلام ده وانت بتسخدم الواسطة  واسطة علشان تدخل مدرسة معينة واسطة علشان تحول من المدرسة واسطة علشان تشتغل واسطة علشان تاخد اعفا من الجيش انا خايف بعد كده اجى ادخل الحمام يقولى لو سمحت مين واسطتك والحمد لله ان الهوا ربنا وفره بالمجان من غير ما يتحكم فيه بشر وانا هنا مش هقولكم انى مثالى وعمرى ما استخدمت الواسطة بالعكس انا استخدمتها كتير فى حاجات كان مفترض انها من حقوقى اصلا بس ما قدرتش اعملها الا بالواسطة .

السؤال هنا لو انت مصرى وفقير ومعندكش الحل السحرى لكل المشاكل اللى هو الواسطة  تعمل ايه هتمرمط فى كل حاجة وحياتك من اول شهادة ميلادك لحد شهادة وفاتك
طبعا دلوقتى عرفتوا اننا شعب متدين فش* ومؤمنين بالعدل والمساواة  ومؤمنين بأن الارزاق بيد الله طبعا انا يمكن معنديش حل عبقرى للقضاء على الواسطة  ودى مش مشكلتى دلوقتى بس السؤال اللى بيطرح نفسه هنا هو احنا كده شعب متدين ؟؟
انا معنديش مانع انك تتعامل بالواسطة وان الناس الحقوق تضيع بينهم بس  يا ريت ما تصدعش اهلى بأننا شعب ما فيش منه حقيقة الامر اننا شعب فاسد ودى حقيقة لازم نتدراكها علشان نقدر نقدم علاج بعد كده
قال تعالى

{ يا أيها الذين آمنوا كونوا قوامين لله شهداء بالقسط ولا يجرمنكم شنآن قوم على ألا تعدلوا اعدلوا هو أقرب للتقوى واتقوا الله إن الله خبير بما تعملون } (المائدة:8)  صدق الله العظيم

لينا تكملة ان شاء الله مع باقى المشاهد

ليه فقاقيع ؟؟

• فقاقيع حياتنا كلها تابوهات وفقاقيع شكلها كويس وبيلمع لكن ممكن تكون فاضية من جوه وسهلة الاختراق بل والانفجار لما تتعرض لأى ضغط او حتى شكة دبوس فقررت انى ادخل شوية جوه الفقاقيع دى واحول اوضح رأى او وجهة نظرى اللى هو ف الاساس برضه فقاعة فكل ما ستحمله هذه المدونة عبارة عن فقاقيع واراء شخصية بالاضافة الى اى مقالات او كتب او اعمال ادبية او اغانى انا بحبها  دمتم سالمين